Uji në Tokë, para formimit të Diellit

Shkenca - Uji në Tokë mund të ketë ekzistuar para formimit të Diellit. Në këtë përfundim mbërritën një grup shkencëtarësh anglo-amerikanë të cilët pretendojnë se zbulimi i tyre revolucionarizon dhe rrit shpresat për gjetjen e jetës aliene.

Studiuesit thonë se uji mund të jetë përbërës i natyrshëm i reve të pluhurit dhe gazit nga të cilat formohet një sistem diellor.

“E dimë që uji është element vital për jetën në Tokë, por me shumë gjasa uji në Tokë ka rrjedhur nga kushtet specifike gjatë formimit të sistemit tonë diellor, një proces që mund të ndodhë edhe në këto momente diku tjetër. Duke identifikuar ‘moshën’ e ujit ne mund të përcaktojmë se mënyra se si është formuar sistemi ynë diellor nuk është unike, por një formë që ndodh rëndom nëpër sisteme të tjera dhe kjo rrit mundësitë se ekzo-planetet (planetet jashtë sistemit tonë diellor), ofrojnë kushtet e duhura për zhvillimin e jetës”, thotë profesori i Universitetit të Ekseterit në Angli, Tim Harris.

Puna e shkencëtarëve u përqendrua në studimin e molekulave të ujit të siguruara nga oqeanet, kometat dhe meteorët. Në të tre molekulat u has një përqendrim i hidrogjenit me ekstra neutrone në bërthamën e tij, gjë e cila mund të shpjegohet vetëm me origjinën ndëryjore.

Kjo çoi shkencëtarët në përfundimin se të paktën një pjesë e ujit të Tokës ka origjinë para formimit të Diellit.